Wednesday, September 12, 2007

తెలుగు ఆన్లయిన్ రేడియో - టోరి

మీలో చాలామందికి తెలిసే ఉంటుంది, తెలుగువన్.కాం వారు ఒక ఆన్లయిన్ రేడియో TORI ని ఈ మధ్యే ప్రారంభించారు. ప్రస్తుతం ఇందులో ఏకకాలంలో 5 స్టేషన్లు 24 గంటలు కార్యక్రమాలు ప్రసారం చేస్తున్నాయి. వీటిని మన కంప్యూటర్లో సులభంగా వినడానికి నేను ఒక చిన్న play list file తయారు చేసాను. కింద ఇచ్చిన వాక్యాలను ఒక ఫైల్లో కాపీ చేసి దానిని .pls ఎక్స్టెన్షన్ తో కాపాడండి. ఉదా TORI.pls అన్నమాట. దీనిని మీ కంప్యూటర్లో ఓపెన్ చేస్తే చక్కగా మనం 24 గంటలు తెలుగు పాటలు వినవచ్చు.
[playlist]
NumberOfEntries=5
File1=http://38.101.195.5:8332/
File2=http://38.101.195.5:8132/
File3=http://38.101.195.5:8032/
File4=http://38.101.195.5:8232/
File5=http://38.101.195.5:8432/

నేను వీటిని వినడానికి Real Player ఉపయోగిస్తున్నాను. windows media player లో ఏదో కోడెక్ సమస్యలు ఉన్నాయి నా కంప్యూటర్లో ..

Thursday, August 23, 2007

పర్యావరాణాన్ని కాపాడండి

ప్రస్తుతం మానవాళి ఎదుర్కొంటున్న ముఖ్యమైన సమస్యలలో పర్యావరణ సమస్య ఒకటి. కేవలం మనమే మన చేతులారా పర్యావరణానికి హాని చేస్తున్నాము. దీనివల్ల భూమిపై కాలుష్యం పెరిగి ఎన్నో దుష్పరిణామలు ఏర్పడుతున్నాయి. కావున దీనికి మన వంతుగ మన చేతనైనంతలో మనం కొన్ని చిట్కాలు పాటించి ఈ అవనికి మన వంతు సేవ మనం చేద్దాం.

మనకు తెలుసు ఈ రొజుల్లో మన జీవితాలతో కంప్యూటర్లు ఎంతగా పెనవేసుకొని పొయాయో. కాని ఈ కంప్యూటర్ల వల్ల పర్యావరణానికి చాల హాని కలుగుతుందంటే మనలో చాల మందికి ఆశ్చర్యముగా ఉండొచ్చు. మనం కంప్యూటర్లు ఉపయోగించినప్పుడు అది వాడుకునే విద్యుశ్చక్తిని తయారు చేయడానికి ఇంధనాలు మండించడమో లేక మరేదో మార్గమ్లో పర్యావరణానికి హాని కలుగుతుంది.

మీరు నమ్మండి నమ్మక పొండి, మనం సాధారణముగా ఉపయోగించే డెస్కుటాప్ పి.సి. కి సరఫరా అయ్యే విద్యుతులో సగం వరకు వ్రుధా అవుతుంది. కొన్ని చిన్న చిన్న చిట్కాలు పాటించడం వల్ల ఇవి ఉపయోగించే విద్యుత్ ని గణనీయముగ తగ్గించ వచ్చు. ఒక సర్వే ప్రకారం తేలిందేంటంటే డెస్కుటాప్ పి.సి.లు వాడే విద్యుత్లో సుమారు 70%-80% వరకు మనం ఆదా చేయవచ్చు. ఆ చిట్కాలేవో ఇక్కడ చూద్దామా?

1. మనమ్ కంప్యూటర్ని ఉపయోగించనప్పుడు మానిటర్ని స్విచ్చ్-ఆఫ్ చేయడం.

2. మన మానిటర్లో బ్రైట్నెస్ ని వీలు అయినంతగా తగ్గించడం.

3. మన కంప్యూటర్లో పవర్ మానెజిమెంట్ ఫీచర్ ని ఆన్ చేయదం. ఈ రొజుల్లో లభించే దాదాపు ప్రతి కంప్యూటర్లో కూడా పవర్ మానేజిమెంట్ ఫీచర్ ఉంటుంది. దానిని సరిగ్గా కాన్ఫిగర్ చేయడం ద్వారా మన కంప్యూటర్ ఉపయోగములో లేనప్పుడు దానంతట అదే ఆగిపొవడం లేదంటే కేవలం మానిటర్ ఒకటే స్విచ్-ఆఫ్ కావడమ్ జరుగుతుంది.

4. ఇంక చివరగ మనం కొత్త కంప్యూటర్లు కొనేముందు అవి తప్పని సరిగా ఎనర్జి-స్టార్ 4.0 కంప్లైంట్ ఉండేలా చూడండి.

Saturday, August 18, 2007

వర్డ్ ప్రెస్ బ్లాగ్స్

నేను ఈ మధ్య గమనించిన విషయం ఏమిటంటే వర్డ్ ప్రెస్ బ్లాగ్స్ సరిగ్గా లోడ్ అవడమ్ లేదు. ప్రతి రోజు కూడలిని ఎంతో ఉత్సాహంగా తెరుస్తాను కొత్త కొత్త టపాలు చదవాలి అని. కాని అందులోని కొన్ని బ్లాగ్స్ ముఖ్యంగా వర్డ్ ప్రెస్ లో హోస్ట్ చేసిన బ్లాగ్స్ చాలా మటుకు లోడ్ అవడం లేదు. మరల మరల ప్రయత్నించగా కొన్ని బ్లాగ్స్ వస్తున్నాయి, కాని కొన్ని మాత్రమ్ అసలు రావడం లేదు. కాని అదే సమయంలో మన బ్లాగ్ స్పాట్లోని బ్లాగ్స్ మాత్రం చక్కగ దర్శనమిస్తున్నాయి. ఖచ్చితంగా ఇది మాత్రం నా అంతర్జాల సమస్య మాత్రం కాదు అని చెప్పగలను. ఎందుకంటే నేను మిగతా అన్ని సైట్లను చక్కగా వీక్షించగలుగుతున్నాను.

ఇది కేవలం నా ఒక్కడికే వస్తున్న సమస్యా లేక మీలో ఇంకా ఎవరికైనా ఎదురయిందా? ఒక వేళ మీలో ఎవరికైనా ఏదైన పరిష్కారం తెలిస్తే సూచించగలరు.

0-5-10-25

ఏంటి ఈ సంఖ్యలు అని అనుకుంటున్నారా? వీటికి మన ఆరోగ్యకరమైన జీవితానికి చాలా దగ్గరి సంబంధం ఉందండి.

ఈ మధ్య మా ఆఫీసులో కొత్తగా 0-5-10-25 ప్రోగ్రాం అని మొదలెట్టారు. దీనిలోని ప్రతి సంఖ్యకి ఒక విశేషం ఉంది. మనం ఆరోగ్యంగా జీవించడానికి ఇవి చాలా అవసరం. అవేంటో ఇక్కడ చూడండి.

0 - సున్నా అనగా శూన్యం లేదా ఏమి లేకపోవడం. అంటే మనం జీవితంలో ఎప్పుడూ కూడా పొగాకు మరియు దానికి సంబంధించిన ఉత్పత్తులు అసలు ఉపయోగించకూడదు.

5 - అయిదు ఏంటంటే మనం ప్రతి రోజు తప్పనిసరిగా కనీసం అయిదు రకాలైన కూరగాయలు లేదా పండ్లు మన ఆహారంలో తీసుకోవాలి.

10 - పది ఏంటంటే మనం ప్రతి రోజు తప్పని సరిగా కనీసం పదివేల అడుగులు నడవడమో లేక ఒక ముప్పై నిమిషాలు ఏదైనా వ్యాయామం చేయడమో చేయాలి.

25 - ఇంక చివరగా పాతిక ఏంటంటే మనం మన BMI(Body Mass Index) ని ఎల్లప్పుడూ పాతికలోపలే ఉంచుకోవాలి.

మీరు అంతా కూడా ఇవన్నీ ఆచరించి నిరంతరం ఆరోగ్యంగా ఉండాలని మనసారా కోరుకుంటున్నాను.

"సర్వేజనా సుఖినోభవంతు"

Monday, August 13, 2007

మంటనక్క తో తంటాలు


నేను నా బ్లాగ్లో టపాలు రాయడానికి లేఖిని వాడుతున్నాను. నేను రాయాలనుకున్నదంతా ముందు లేఖినిలో రాసుకోని తర్వాత దానిని మొత్తం కాపీ చేసుకొని నా బ్లాగ్లో కొత్త టపా డబ్బాలో అతికిస్తున్నాను. మొదటినుంచి కూడా నేను ఈ విధానాన్నే అనుసరిస్తున్నాను. ఇలా చేయడం వల్ల నా టపాలు IE లో చాలా చక్కగా కనపడుతున్నాయి. కాని మంటనక్కలో మాత్రం హెడింగ్స్ సరిగ్గా కనపడ్డం లేదు.

నాకు మంటనక్క ఉపయోగించడం అంటే చాలా ఇష్టం. కాని నా ఈ సమస్య వల్ల బ్లాగ్లు మాత్రం నేను IEలో చూస్తున్నాను, మిగతా అంతర్జాల విహారానికి మాత్రం మంటనక్కను ఉపయోగిస్తున్నాను.

దయచేసి ఎవరయినా ఈ సమస్యకి పరిష్కారం చూపించగలరా? మన మిగతా చాలా మంది మిత్రుల బ్లాగ్లు మంటనక్కలో కూడా చక్కగా కనపడుతున్నాయి. నేను నా బ్లాగ్లో పాత టెంప్లేట్ వాడుతున్నందువల్ల ఈ సమస్య ఏమయినా వస్తుందా?

Sunday, August 12, 2007

తొక్కలో సందేహం

నాకు ఎప్పటినుంచో ఉన్న ఒక సందేహం ఏమిటంటే మన తెలుగు సినిమాలలో పేర్లు వేస్తున్నప్పుడు అందరివి తెలుగులో వేసి చివరగా నిర్మాత, దర్శకులవి మాత్రం తెలుగు మరియు ఇంగ్లీష్లో వేస్తారు. ఎందుకలగ??

Friday, July 13, 2007

అమెరికా జీవితం

అమెరికా జీవితం గురించి నాకు కలిగిన అభిప్రాయం.

ఇక్కడ అమెరికాలో మనకు సెల్ఫోన్,కార్,ఇంటర్నెట్ ఎంతగా అవసరమో మూడు వాక్యాల్లో నా ఫీలింగ్.

1. సెల్ఫోన్ లేదు అంటే మన పరిస్థితి మూగ,చెవిటి లాంటిది.
2. కార్ లేదు అంటే మన పరిస్థితి వికలాంగుల పరిస్థితే.
3. ఇంక చివరగా ఇంటర్నెట్ లేదు అంటే మనం గుడ్డీ వాళ్ళ కిందే లెక్క.

నేను ఇక్కడకి వచ్చి ఇప్పటికి దాదాపు నెల రోజులు కావొస్తుంది. నాకు పైన చెప్పిన వేవి లేవు. ఈ నెల రోజుల్లో నేను అనుభవించిన కష్టాలు నాకు ఈ ఫీలింగ్ కలిగించాయి.

Tuesday, July 03, 2007

'టిప్పు ' సుల్తాన్

మొన్న పొయిన ఆదివారం మా కంపనీ ప్రెసిడెంట్ మా గెస్ట్ హౌస్ కి వచ్చిన సంధర్భంగా రూంలో ఒక చిన్న పార్టీ ఏర్పాటు చేసుకున్నాము. సరే పార్టీ కదా ఎవరికి ఇష్టం వచ్చినది వారు త్రాగుతున్నారు, తింటున్నారు. ఇంతలో మా వాడు ఒకడికి వెజిటేరియన్ పిజ్జా తినాలనిపించింది. షాప్ కి వెళ్లి కొనుక్కురావలంటే సమయం రాత్రి 10.00 అవుతుంది. పైగా మా వాళ్లకి ఎవరికి ఇక్కడి అమెరికా డ్రయివింగ్ లైసెన్స్ లేదు. సరేలే ఆన్లయిన్లో ఆర్డర్ ఇద్దాము లెమ్మని www.pizzahut.com సైట్ కి వెళ్లి ఒక 2 వెజ్ పిజ్జాలు ఆర్డర్ ఇచ్చాము. వాడు సైట్ లో డెలివరీ టైం 30 నిమిషాలు అని ఇచ్చాడు. సరేలే ఇక చేసేదేముంది అని అలాగే పార్టీ ఎంజాయ్ చేస్తూ పిజ్జా కోసం ఎదురు చూస్తున్నాము.

చెప్పొద్దు, నిజంగా ఇక్కడ టైం అంటే టైమె. సరిగ్గా 30 నిమిషాలు అయ్యాయొ లేదొ టింగ్ టింగ్ మని మా డోర్ బెల్ మోగింది. డోర్ తెరవగానె ఎదురుగా పిజ్జాహట్ డెలివరి బాయ్ పిజ్జాలు నీట్ గా ప్యాక్ చేసుకోని వచ్చాడు. ఆహా, ఏమి సమయపాలన అనుకుంటు వాడి దగ్గర నుంచి పిజ్జాలు తీసుకోని బిల్ తీసుకున్నాను. బిల్ల్ చూస్తే 31డాలర్స్ 50సెంట్స్ అయింది. నా దగ్గర చూస్తే సరిపొయే చిల్లర లేదు. ఆహ వీడు సరిగ్గా సమయానికి తెచ్చాడు. పాపం వీడికి ఒక 1-2 డాలర్స్ అయినా టిప్ ఇవ్వాలి అని అనుకుంటు రెండు 20 డాలర్ నోట్లు వాడికి ఇచ్చాను. ఇలా డబ్బులు ఇచ్చానో లేదో అలా వాటిని జేబులో పెట్టుకుంటు "థాంక్యూ సర్" అని వెళ్లిపోయాడు. చెప్పొద్దు నాకు అసలు నొటమ్మట మాట రాలెదు. వెదవ 31.5డాలర్స్ కి 8.5డాలర్స్ టిప్ తీసుకున్నాడు. అంటే దాదాపు 26% అన్నమాట.

తర్వాత మా ఫ్రెండ్ చెప్పాడు, ఇక్కడ మనం ఏమి సెపరేట్గా టిప్ ఇవ్వాల్సిన అవసరం ఉండదు. మనం ఇచ్చిన డబ్బులు టిప్ తో కలిపే ఇచ్చామనుకుంటారు అని. ఒకవేళ మనం చిల్లర లేక ఎక్కువ డబ్బులు ఇవ్వాల్సి వస్తే ఇచ్చెముందే చెప్పాలంట ఎంత తీసుకోవాలో అని. మొత్తానికి ఎలా అయితేనేమి ఆ రోజు నా ప్రమేయం లేకుండానే టిప్పు సుల్తాన్ అయిపొయాను.

Saturday, May 12, 2007

మదర్స్ డే

ముందుగా ఈ రోజు మదర్స్ డే సందర్భంగా ప్రపంచంలోని అమ్మలందరికి "ఎ వెరీ వెరీ హ్యపీ మదర్స్ డే".

"అమ్మ" - నాకు తెలిసి ఈ స్రుష్టిలో అమ్మ కన్న గొప్పది ఇంకేమి లేదు. అమ్మే లేకపోతే మనమెవరమూ లేము. మనల్ని నవమాసాలు మోసి, పురుటి నొప్పులు భరించి కని, మనల్ని కంటికి రెప్పలాగా కాపాడి, మన ఆలనా పాలనా చూసి, పెంచి పెద్ద చేస్తుంది. మరి అలాంటి అమ్మకి మనం ఏమి చేసినా తక్కువే.

ఒక విషయంలో మాత్రం నేను లక్కీ అని భావిస్తా. అదేంటంటే చిన్నప్పటి నుంచి కూడా నేను అమ్మని విడిచి ఉన్నది చాలా తక్కువ. చిన్నప్పుడు 10వ తరగతిలో ఒక సంవత్సరం మాత్రం హస్టల్లో ఉన్నాను. అదొక్కటే నేను అమ్మని విడిచి చాలా రోజులు ఉన్నది. తర్వాత పాలిటెక్నిక్ కోసం హైదరాబాద్లో 3 సంవత్సరాలు హస్టల్లో ఉన్నాను కాని ప్రతి శని, ఆది వారాలు తప్పకుండా ఇంటికి వెళ్లేవాడిని. అప్పట్లో మేము నల్లగొండ జిల్లా "ఆలేరు"లో ఉండేవాళ్లం. అది హైదరాబాద్ కి జస్ట్ 70కి.మీ. మాత్రమే. నాన్నగారు రైల్వేలో పనిచేస్తుండడం చేత నాకు అప్పట్లో ఫ్రీ రైల్వే పాస్ ఉండేడిది. అందుకని నాకు అప్పట్లో ఇంటికి దూరంగా ఉన్నాను అనే బెంగ ఉండేది కాదు. కాని పోయినేడాది అమెరికా వెళ్లినప్పుడు మాత్రం అమ్మని, అమ్మ చేతి వంటని చాలా మిస్ అయ్యాను. దాని మీద వ్రాసిన టపా కోసం ఇక్కడ క్లిక్ చేయండి.

పాపం మా చిన్న తమ్ముడు మాత్రం ఈ విషయంలో నాకు పూర్తిగా వ్యతిరేకం. వాడు ఇప్పటికి దాదాపు 10 సంవత్సరాలుగా చదువు, ఉద్యోగ నిమిత్తం ఇంటికి దూరంగా ఉంటున్నాడు. వాడి ఉద్యోగం కూడా ఇప్పుడు గుజరాత్ లోని వడొదరలో. మేము ఎప్పుడు మాట్లాడుకున్నా వాడు తప్పకుండా అనే మాట ఒకటి ఏంటంటే "నువ్వు నిజంగా చాలా లక్కీ, ఎప్పుడూ అమ్మ దగ్గరే ఉంటావు" అని.

అమ్మ గురించి ఎక్కడో చదివిన ఈ వాక్యం నాకు ఎంతో ఇష్టం.

"దేవుడు ప్రతి చోట తను ఉండడం సాధ్యం కాక అమ్మను స్రుష్టించాడు" నిజంగా నిజం కదూ ఈ మాట.

Tuesday, April 24, 2007

లగ్గం పిలుపు

లగ్గం పిలుపు (తెలంగాణా మాండలికంలో)

మా పెద్ద పోరడు
చి ఎల్లయ్య
&
చి సౌ ఎల్లమ్మ
(సత్తెన్న చిన్న బిడ్డ)

అనే పోరిని లగ్గం చేసుకుంటుండు, మరి మీరంతా మొగుడు,పెండ్లాలు, పోరగాళ్లతోని లేకపోతే నచ్చిన పోరి/పోరగానితోని యాది మరవకుండ రండ్రి.
ఎప్పుడుంది అంటే గీ శనివారం దినామ్న పొద్దుగాల్ల DEC 2411.41 కి.

ఎక్కడ్ననంటె మన అశొక్ అన్న హాల్ లేదా, బోయినపళ్లి కాడ, గాడనే..

అన్న మల్ల మరిసిపొవద్దు సూడు మరి మంచిగుండదు రాకుంటే మల్ల...
లగ్గం అయినంక మల్ల మంచిగ తినిబోవాలె సూడు...

మల్ల పిలిచేటోల్లు ఎవలంటే

చిల్లిమాకు పెంటయ్య.

గమనిక: కేవలం సరదా కోసమే ఇది రాసాను. అంతే కాని ఎవరిని నొప్పించడానికి కాదు. ఎవరినైనా నొప్పిస్తే క్షంతవ్యుడను.

Monday, April 23, 2007

కామన్ పాయింట్

ఇద్దరు బిచ్చగాళ్లు లేదా ఇద్దరు సాఫ్ట్ వేర్ ఇంజనీర్లు మొదటిసారి కలుసుకున్నప్పుడు ఏమి మాట్లాడుకుంటారు?
..

..

..

..

..

..

..

..


నువ్వు ఏ ప్లాట్ ఫాం మీద పని చేస్తున్నావు అని...

Thursday, April 19, 2007

వానా వానా వందనం!!!

ఈ మధ్య రాష్త్రంలో గత వారం, పది రోజులుగా ప్రతిరోజు వర్షం వస్తుంది. ఇలా వర్షం వస్తే మనకు బాగానే ఉంటుంది కాని పాపం రైతులకే ఈ అకాల వర్షాల వల్ల పంటలు నాశనం అయిపొతున్నాయి. సరిగ్గా పొద్దున్నే ఆఫీస్ కి వెళ్లే టైంకి వాన మొదలయ్యింది అంటే ఇంక ఆ రోజు ఆఫీస్ కి వెళ్లాలనిపించదు. హాయిగా ఆ రోజుకి ముసుగు తన్ని పడుకుంటే బాగుండు అని అనిపిస్తుంది. చిన్నప్పుడు ఇలా ఆకస్మిక వర్షం వస్తే ఎంచక్కా ఆ రోజుకి స్కూల్/కాలేజికి డుమ్మా కొట్టేసేవాడిని. కాని ఇలా ఎప్పుడు అంటే అప్పుడు ఆఫీస్ కి డుమ్మా కొట్టేస్తే జీతంలో తెగ్గోస్తాడు లేదంటే మనకే శాశ్వతముగా డుమ్మా కొట్టే ప్రమాదం ఉంది.

అప్పుడప్పుడు నాకు ఈ వర్షానికి, నా బండి కి ఏమైనా సంబంధం ఉందా అని అనిపిస్తుంది. అసలే నా బైక్ ఎప్పుడూ మట్టి కొట్టుకుపొయి, బురద మరకలతో ఉంటుంది. ఛా..ఇలా అయితే బాగుండదు, మనం అయితే రోజూ సుబ్బరంగా తయారవుతాము కదా కాబట్టి మన బండి కూడా మన లాగే నీట్ గా ఉండాలి అని ఒకరోజు డిసైడ్ అయిపొయి ఆ రోజు బండి ప్రక్షాళనా కార్యక్రమం మొదలెడతాను. ఒక 30 నిమిషాలు చచ్చి చెడి మొత్తానికి బండిని కొత్త దానిలాగా, చూడగానే ముద్దొచ్చేలా తయారుచేస్తాను. అదేంటో తెలీదు అప్పుడు మాత్రం మన మీద మనకే ఒక విధమైన ఫీలింగ్ కలుగుతుంది.

సరే మొత్తానికి బండి శుభ్రంగా అయ్యింది, ఇంక ఎప్పుడు దీనిని ఇలాగే మైంటైన్ చేయాలి అని అనుకుంటాను. సరే దానిని బయటకి తీసి అలా ఆఫీస్ కో లేక మార్కెట్ కో వెళ్తాను. అదేంటో అప్పటి వరకు కూడా పెళ పెళ ఎండ కాస్తున్నా కూడా సడెన్ గా వాతావరణం మారిపొయి టపటపమని వర్షం మొదలవుతుంది. సరిగ్గా అలా ఓ 10-15 నిమిషాలు పడ్డాకా, నా బండి మొత్తం మళ్లా ఎప్పట్లాగా బురద కొట్టుకుపోయాకా ఆగిపొతుంది. ఇంక అప్పుడు చూడాలి నా పరిస్తితి. నా మీద నాకే చిరాకొచ్చేస్తుంది.

ఏంటో ఎప్పుడు బండి కడిగినా కూడా వర్షం వచ్చేస్తుంది. ఈ సారి అలా చేయకూడదనుకోని దానిని అలాగే వదిలేస్తాను. అప్పుడు ఎన్నాళ్లయినా నా బండి అలాగే ఉంటుంది, వర్షం మాత్రం రాదు. అలా ఆ బురద, మట్టి ఉన్న బండినే తోలుతుంటాను. ఇంట్లో వాళ్లు చూసి చూసి "ఏంట్రా, బండి చూడు ఎలా తగలడిందో, కాస్తా వళ్లు వంచి దానిని కడుగుకోవచ్చు కదా" అని నాలుగు అక్షింతలు వేస్తారు. అప్పుడు మళ్లా ఒకరోజు రెచ్చిపోయి దానిని సుబ్బరంగా కడిగి పెళ్లి కూతురులా ముస్తాబు చేస్తాను, ఆ రోజో లేదా మరుసటి రోజో వర్షం తప్పకుండా వస్తుంది. ఇదంతా ఓ సైకిల్ లాగా ఎప్పుడూ జరుగుతూనే వుంటుంది.

Wednesday, April 11, 2007

ఎప్పుడూ ఒప్పుకోవద్దురా ఓటమి.

సిరివెన్నెల సీతారామశాస్త్రి గారు "పట్టుదల" సినిమా కోసం రాసిన ఈ పాట నాకు ఎంతో ఇష్టం. సినిమా అంతగా ఆడకపోవడంతో చాలా మందికి ఈ పాట గురించి తెలియదు. కాని ఒక్కసారి ఈ పాట వింటే మాత్రం మనం ఒక విధమైన ఉత్తేజానికి లోను అవ్వడం ఖాయం. ఎంతటి నిరాశా నిస్ప్రుహళ్లో ఉన్నా కూడా ఈ పాట వింటే మనం కొత్త ఉత్తేజాన్ని పొందుతాము. తీవ్ర నిరాశలో కూరుకుపొయి జీవితాన్ని చాలిద్దాం అని అనుకున్న ఎంతో మంది ఈ పాట విని మనసు మార్చుకొని తిరిగి కొత్త జీవితాన్ని మొదలెట్టారని శాస్త్రి గారే స్వయంగా చెప్పారు.

చిత్రం : పట్టుదల
రచన : సిరివెన్నెల సీతారామశాస్త్రి
గానం : జేసుదాస్
సంగీతం : ఇళయరాజా.

ఎప్పుడూ ఒప్పుకోవద్దురా ఓటమి
ఎప్పుడూ వదులుకోవద్దురా ఓరిమి
విశ్రమించవద్దు ఏ క్షణం విస్మరించవద్దు నిర్ణయం
అప్పుడే నీ జయం నిశ్చయం రా.. ఎప్పుడూ

నింగి ఎంత గొప్పదైనా రివ్వుమన్న గువ్వపిల్ల రెక్క ముందు తక్కువేనురా
సంద్రమెంత పెద్దదైనా ఈదుతున్న చేపపిల్ల మొప్ప ముందు చిన్నదేనురా
పశ్చిమాన పొంచి ఉండి రవిని మింగు అసుర సంధ్య ఒక్కనాడు నెగ్గలేదురా
గుటకపడని అగ్గి ఉండ సాగరాలనీదుకుంటు తూరుపింట తేలుతుందిరా
నిశా విలాసమెంత సేపురా ఉషొదయాన్ని ఎవ్వడాపురా
రగులుతున్న గుండెకూడా సూర్యగోళమంటిదేరా..... ఎప్పుడూ

నొప్పి లేని నిమిషమేది జననమైన మరణమైన జీవితాన అడుగు అడుగునా...
నీరసించి నిలిచిపోతే నిమిషమైనా నీది కాదు బ్రతుకు అంటే నిత్య ఘర్షణ.
దేహముంది ప్రాణముంది నెత్తురుంది సత్తువుంది
అంతకన్నా సైన్యముండునా
ఆశ నీకు అస్త్రమౌను శ్వాస నీకు శస్త్రమౌను
ఆశయమ్ము సారధౌనురా
నిరంతరం ప్రయత్నమున్నదా నిరాశకే నిరాశ పుట్టదా
ఆయువంటు ఉన్న వరకు చావుకూడా నెగ్గలేక శవము పైనే గెలుపు చాటురా...........ఎప్పుడూ

నెట్ లో ఈ పాట ఆడియో కోసం ఎంతగానో ప్రయత్నించాను కాని దొరకలేదు. దయచేసి ఎవరి దగ్గరైనా ఈ పాట MP3 లేదా Real ఫార్మాట్ లో ఉంటే దయచేసి నాకు పంపగలరు.

మరిన్ని మంచి పాటలతో మరోసారి కలుసుకుందాం.

సెలవు...

Tuesday, April 10, 2007

అమ్మ చేతి వంట

నాకు తెలిసి ఈ స్రుష్ఠిలో అన్నింటికన్నా రుచికరమైన పధార్థం ఏంటంటే "అమ్మ చేతి వంట". మిగతా వారి సంగతి ఏమో కాని నాకైతే అమ్మ చేతి వంటకి సాటి ఏదీ రాదు. నా చిన్నప్పుడు అమ్మ నాకు అన్నం, పెరుగు, చింతకాయ పచ్చడి కలిపి ఇస్తే ఎంతో ఇష్టంగా తినేవాడిని. కాని అవే అయిటంస్ నేను కలుపుకొని తింటే అంత రుచిగా అనిపించేది కాదు. అప్పట్లొ నేను బాగా ఆలోచించేవాడిని ఏంటబ్బ ఇందులోని గమ్మత్తు, సేం అయిటంస్ అమ్మ కలిపి పెడితే ఎంతో రుచిగా వున్నాయి, కాని నేను కలుపుకొని తింటే మాత్రం అంత రుచిగా లేవు. అదే మరి అమ్మ చేతి మహత్యం అంటే....

మనం ఎప్పుడూ ఇంట్లోనే వుంటూ అమ్మ చేతి వంట తింటుంటే మనకు దాని విలువ తెలీదు. ఎప్పుడైతే మనం ఇంటికి దూరంగా వుంటామో అప్పుడు తెలుస్తుంది. ఇదే అనుభవం నాకు ఎదురయింది, అందుకనే స్వానుభవంతో చెప్తున్నాను.

నేను చిన్నప్పటి నుంచి వంటరిగా వున్నది లేదు. నా చదువులు అన్ని మా స్వంత ఊరిలోనే అయ్యాయి. మధ్యలొ ఒక 3 సం.లు మాత్రం హాస్టల్లో ఉండి చదువుకున్నాను. అందుకని ఎప్పుడూ నాకు వంట చేసుకొని తినే బాధ రాలేదు. కాని పోయినేడాది ఆఫీస్ పని మీద ఒక 2 నెలలు అమెరికా వెళ్లినప్పుడు తెలిసింది అమ్మ చేతి వంట విలువేంటో.

నేను అమెరికా వెళ్లక ముందు వరకు కూడా ఎప్పుడూ మ్యాగీ తిన్నది లేదు. నాకు మన సంప్రదాయ టిఫిన్స్ అయిన ఉప్మా, ఇడ్లీ, వడ ఇవే బాగా నచ్చుతాయి. కాని బర్గర్స్, పిజ్జాస్, మ్యాగీస్ ఇలాంటివి అస్సలు ఇష్టం ఉండవు. మా వాళ్లంతా వండుకోవడం సులువు అని చెప్పి ఒక డజన్ మ్యాగీ పాకెట్స్ నా లగేజ్ లో పెట్టారు. మా అద్రుష్టం కొద్దీ మా హొటల్ పక్కనే మెక్ డోనాల్డ్స్ వుంది. సో అక్కడికి వెల్లగానే మొదటి వారం రోజులు మెక్ డోనాల్డ్స్ లోనే తినేవాళ్లం. అలా ఒక వారం రోజులు తినే సరికి అది కాస్తా మొహం మొత్తింది. ఇంక అప్పుడు మనం వంట చేసుకొని తినాలి అని డిసైడ్ అయ్యాను. అసలు అమెరికా లో వంట చేసుకుందామనే నాకు ఇష్టమైన కూరలు, పప్పులు అన్ని ఇంట్లో వాళ్లతో ఎలా చేయాలో రాయించి మరీ తీసుకెల్లాను ఒక వంటల పుస్తకం.

సరే ఫ్రెష్ గా వారం మొదటి నుంచి మొదలుపెడదామని సోమవారం ఉదయం పొద్దున్నే మ్యాగీ చేసాను. జస్ట్ దాని మీద ఉన్న సూచనలు చదవడం, చేయడం అంతే. చాలా సులువుగా అనిపించింది. అదే మొదటిసారి నేను మ్యాగీ చేయడం, తినడం. అంతకు ముందు రాత్రి సరిగ్గా తిని వుండక పొవడం, పైగా అది మన స్వయం పాకం కావడం, మొదటిసారి ఆ రుచి చూడ్డంతో తినగానే బాగానే అనిపించింది. ఇదేదో బాగుంది కదా అని మొత్తం లాగించేసాను. అప్పుడు దాని రుచి నచ్చింది, సరే ఇదేదో సులువుగా వుంది చేయడం, మధ్యాహ్నం కూడ దీనితోనె కానిచ్చేద్దాం అని రెచ్చిపోయి ఇంకో ప్యాకెట్ మ్యాగీ మళ్లా అప్పుడు వండాను. అలా వండి దానిని నా టిఫిన్ బాక్స్ లొ సర్ది దానినే స్టయిల్ గా ఆఫీస్ కి తీసుకెళ్లాను.

సరే ఇంక మధ్యాహ్నం లంచ్ సమయం అయింది. మన స్వయం పాకం మన దగ్గర వుంది కదా, ఇంక కాంటీన్ కి వెల్లడం ఎందుకు దండగ అని, ఆఫీస్ కిచెన్ లోకి వెళ్లి ఒక కోక్ తెచ్చుకున్నాను. అక్కడే సీట్ లోనే కూర్చోని మ్యాగీ విత్ కోక్ లాగించ్చేద్దాం అని నా టిఫిన్ బాక్స్ మూత తెరిచాను. ఇంకేముంది ఆ మ్యాగీ కాస్తా గట్టిగా అయింది. ఇంక అప్పుడు వేరే దారి లేదు, చచ్చినట్టు అదే తినాల్సిందే. అప్పుడు నా బాధలు ఇంక ఆ భగవంతుడికే తెలియాలి. కొద్ది కొద్దిగా దానిలో నీళ్లు పోసుకుంటూ, ముద్ద ముద్దకు కోక్ తాగుతూ బలవంతంగా మ్యాగీ మొత్తం తినేసాను. అప్పుడు నిజంగా అనిపించింది "అబ్బా, ఎందుకు వచ్చామురా బాబు ఇక్కడికి" అని. ఆ దెబ్బతో మళ్లీ మ్యాగీ అంటేనే విరక్తి వచ్చేసింది. ఆఫ్ కోర్స్ తర్వాత కొన్ని సార్లు తప్పని సరి పరిస్తితుల్లో మ్యాగీ తిన్నాను, తింటున్నాను కూడా.

మొత్తానికి అలా అమెరికా అనుభవాలతో ఏదో కొద్దిగా వంట అదీ నేర్చుకున్నాను. ఇప్పుడు నేను వంట బ్రహ్మండంగా చేయలేకపోయినా చెత్తగా మాత్రం చేయను. కాని నాకు వీలు ఉన్నంతవరకు అమ్మ చేతి వంట తినడానికే ప్రయత్నిస్తాను.

Tuesday, April 03, 2007

Whom to blame for India's defeat in World Cup?

వరల్డ్ కప్ లో మన ఇండియా ఓటమికి భాధ్యులు ఎవరు?

ఈ ప్రశ్నకు బాగా బాగా ఆలోచించగా నాకు సమాధానం దొరికింది.
అదేంటొ చూడాలంటే కిందికి స్క్రోల్ చేయండి.

..
..
..
..
..
..
..
..
..
..


..

..


..
..

..

దీనికి కారణం ఒకరు, ఇద్దరు కాదు. ఆక్షరాలా ముగ్గురు. వారే1. ఇందిరా గాంధి2. హనుమంతుడు3. బెర్ముడా ఆటగాళ్లు.
ఎందుకంటే
1. ఇందిరా గాంధి నే కదా బంగ్లాదేశ్ ఏర్పడడానికి కారణం.
2. హనుమంతుడు అప్పట్లో లంకను పూర్తిగా తగలెట్టలేదు.

3. ఇక చివరగా బెర్ముడా ఆటగాళ్లు ఎంతో కీలకమైన మ్యాచ్ లో చాలా చెత్తగా బ్యాటింగ్, బౌలింగ్, ఫీల్డింగ్ చేసి ఓడిపోయారు. అదేనండీ వాళ్ల చివరి మ్యాచ్ బంగ్లాదేశ్ తో.
[ఈ పొస్ట్ నాకు వచ్చిన ఒక మెయిల్ ఆధారంగా రాయడం జరిగింది]

Sunday, April 01, 2007

April Fool !!!

చిన్నప్పుడు స్కూల్ లో ఉన్నప్పుడు ఏప్రిల్ 1 వస్తుంది అంటే అదోలా ఉండెది. ఎందుకో తెలుసా, ఆ రోజే నా పుట్టిన రోజు. పుట్టిన రోజు కదా అని ఫ్రెండ్స్ అందరికి చాక్లెట్స్ గట్రా ఇద్దామని అనుకంటే ఎవరూ తీసుకునే వారు కాదు. నేనేదో ఏప్రిల్ ఫూల్ చేస్తున్నానని పెద్ద అనుమానం వెధవలకి. నాకేమో ఆ రోజు కొత్త బట్టలు వేసుకోవాలని, అందరికి చాక్లెట్స్ అవీ ఇచ్చి వాళ్లంతా గ్రీటింగ్స్ చెప్తుంటే అందుకోవాలని ఉండేది. అలా కొన్నాళ్లు గడిచాక ఇంక లాభం లేదు అని ఏప్రిల్ 1 నాడు స్కూల్ లో పుట్టిన రోజు చేసుకోవడం మానేసాను.

Thursday, March 29, 2007

Happy Birthday Teja

హ్యపీ బర్త్ డే తేజ

ఈ రోజు తేజ రెండవ పుట్టిన రోజు, చూస్తూ ఉండగానే అప్పుడే 2 సంవత్సరాలు అయ్యాయి. టైం చాలా తొందరగా గడిచిపొతుంది. ఇంక తనని ఈ జూన్/జూలై లో ప్లే స్కూల్లో వేయాలి. చూడాలి స్కూల్ కి వెళ్లడానికి ఎంత పేచీ పెడుతుందో.